ما زلت أبحث عني ..فتحتُ خزانتي فلم أجدني ..ذهبتُ لجارنا وقلت له : هل عرفتني ..فقال : مار عليّ ( هالزُّقم ) قبل هيك بس مين إنت بالضبط؛ والله يا عموه ما بعرف ..!!..ذهبتُ لزوجتي فقالت :والله والله ألمّ عليك الدنيا إذا ما تمشي من هان ؛ إمشي اطلع برّة ..!! حضنت أولادي ..هربوا من حضني باتجاه صورة لشخصٍ كان أنا ..!! قلتُ لحالي : ما فيش إلاّ أمّي ؛ هيّ إللي ( بزّتني ) و ربتني أكيد رح تعرف مين أنا ..؟ رحتلها ..كيفك يُمّا ..لم ترد ..كيفك ماما ..لم ترد ..كيفك مامي ..لم ترد ..!!
رجعت لأخواني ..ما حدا راضي ينظر لي بحرارة ..كلهم يعتقدون بأنني مرّاق طريق ..!! لمْ ألُمْ أحداً ؛ فأنا كذلك لم أعرفني ..ولكن ما المشكلة ..؟؟ ما الذي حدث بالضبط ..؟؟ ليش ما حدا متعرف عليّ ؛ حتى أنا ..؟؟ هل حصل شيء في شكلي ..ذهبتُ للمراية ..لم تظهر صورتي ..قلت لحالي مرة ثانية : لأكون ميّت وأنا مش داري ..!!
من أنا ..؟؟ ولماذا ينكرني الجميع ..؟؟ ليش هيك ..ليش ..؟؟ قلت ..سأذهب للحكومة ؛ هاي الطايح رايح عندها وأكيد رح تقولي : أخيراً زقطناك ..مش مهم ..تقول إللي تقولو ؛ بس خليها تتعرف عليّ ..وما كنت خيّاب و رحتلها ..قعدت بحضنها ,,ما حكت شي ؛ ما أحسن الحكومة …!! لعبت بشعراتها..وما حكت شي ..يا الله ما أروعها ..!! قررت أن أصرخ في وجهها وقلتُ لها : مين أنا ..أكيد عرفتيني ..؟؟ ضحكت وقالت : إنت المواطن الأردني إللي بطل يعرف حالو ولا حدا يعرفوا ..إنت حبيب الحكومة الدائم و البطل العالمي في رفع الأسعار ..الذي فقد كل شيء ولكنه لم يفقد الحكومة….!!!
